Thursday, December 27, 2012

අවසන් ගමන් එකට ගිය මිතුරන් සිව් දෙනා


පසුගිය 22වන සෙනසුරාදා දින තිස්ස වැවේ සිදුවූ අවාසනාවන්ත බෝට්ටු අනතුරින් මෙලොව හැරගිය හත් දෙනා අතුරින් සිවු දෙනෙක්ම ඉංගිරිය, ශාන්ත පීතර ජනපදයේ පදිංචි අය වන අතර, ඔවුන්ගේ අවසන් කටයුතු අඟහරුවාදා(25) සවස ඉංගිරිය, ශාන්ත පීතර ජනපදයේ පොදු සුසාන භූමියේදී, සමූහ මිනී වළක භූමිදාන කෙරුණේ සමස්ත ශාන්ත පීතර ජනපදයම සෝ සයුරක ගිල්වමිනි. 

මෙලෙස එකට එක්ව අවසන් ගමන් ගිය ශ්‍රියන්ත පීරිස් (32), සිරිදරන් මුතුකුමාර (18), රසික චන්ද්‍රලාල් (26) සහ කේ.පී. අසේල නිරෝෂන් (20) යන සිවු දෙනාගෙන් දෙදෙනෙක් බෞද්ධයින් වන අතර, අනෙක් දෙදෙනා දමිළ ජාතිකයින් වෙති. 


ශාන්ත පීතර ජනපදයේ ප්‍රජා ශාලාවේ එක පේළියට තැන්පත් කර තිබුණු ඔවුන්ගේ දේහයන් හතරේ අවසන් කටයුතු බෞද්ධ - හින්දු කිසිදු ආගම් භේදයකින් තොරව බෞද්ධ චාරිත්‍රානුකූලව සිදු කෙරුණේ සියල්ලන්ටම විශාල ආදර්ශයක්ද ලබා දෙමිනි.

අවට විහාරස්ථාන වල ස්වාමින් වහන්සේලා විසි දෙනෙකුගේ පමණ සහභාගිත්වයෙන් මෙම අවසන් කටයුතු සිදු කෙරුණු අතර හඳපාන්ගොඩ ගණේ විහාරාධිකාරී බටුගම්පළ චන්ද්‍රසිරි හිමියන් ඇතුළු ස්වාමින් වහන්සේලා රැසක්ම මෙහිදී අනුශාසනා පවත්වන්නට යෙදුණු අතර, මියගිය අයගේ පවුල් සියල්ලේම ඥාති හිතමිතුරන් සියල්ල එකට එක්වී ආගමික වතාවත් වලට සහභාගි වන ලදී.


මියගිය සිවු දෙනාගේ රාජකාරි ස්ථානයේ නිලධාරී මහතුන්ද මෙම අවස්ථාව වෙනුවෙන් සහභාගි වී සිටි අතර, ප්‍රදේශවාසීන් දහසකට අධික සංඛාවකගෙන් අතුරු සිදුරු නොමැතිව ශාන්ත පීතර ජනපදයේ ප්‍රජා ශාලා භූමිය පිරී ඉතිරී ගොස් තිබුණි.

කුඩා කාලයේ එක්ව කෙළිදෙළෙන් ගතකර, පසුව ජීවිතයේ භාරදූර වගකීම් සියතට ගැනීමෙන් පසුව එක්ව රාජකාරි කළ මේ අපූරු මිතුරන් සිවු දෙනා අවසානයේ එකම මිනී වළක, එකිනෙකාට ළංව, සදහටම නිහඩව සැතපුණු අතර, ඔවුන්ගේ සිරුරු සැතපුණු පෙට්ටි මතට ඥාතීන්ගේ අතින් දමනු ලැබූ පස් පිඩවල් මෙන්ම නෙතින් වැටුණූ කදුළුද එකතු වනු අපට පැහැදිලිව දැකගත හැකිවිය.

තරුණ වියේ නාහෙට නාහන කමට හෝ වේවා, කොලූ වයසේ දඩබ්බරකමට හෝ වේවා, එසේත් නැත්නම් වෙන කුමන හෝ හේතුවකට හෝ වේවා, ඔවුන් ගිය භයානක ගමනේ විපාක වලට ඔවුන්ට වන්දි ගෙවීමට සිදුවුණේ තමන්ගේ ජීවිත වලින් වීම කණගාටුවට කරුණක් වුවත්, මෙම සිදුවීමෙන් අනෙක් තරුණ පිරිස් වලට ඉගෙන ගන්නවා නම් ඉගෙනීමට විශාල පාඩමක් ඇති බව අවසාන වශයෙන් සඳහන් කිරීම වටී.

ඡායාරූප බලන්න පහතින් 

මියගිය ශ්‍රියන්ත පීරිස්

 සිරිදරන් මුතුකුමාර (18)

 රසික චන්ද්‍රලාල් (26)

 කේ.පී. අසේල නිරෝෂන් (20)
 
 ආගමික වතාවත් සිදු කෙරෙමින්

මියගිය අයගේ දේහයන් එකම ස්ථානයක තැන්පත් කර තිබුණු ආකාරය

මියගිය සිවුදෙනා එකම ස්ථානයක තැන්පත් කළ අයුරු


ඥාති හිතමිතුරන්ගේ කරපිටින් දේහයන් සුසාන භූමිය වෙත රැගෙන යද්දී.

මියගිය සිවු දෙනා වෙනුවෙන් ගම්මානයට පිවිසෙන ස්ථානයේ ඉදිකර තිබුණු තොරණ

ජායාරුප හා වාර්තාව : නිමාලි කහවල

No comments:

Post a Comment